ازاي تختاري خامة أو قماش الإيشارب صح؟
نوع القماش أو خامة الإيشارب تعتمد على نوع اللبس، كمان فيه أنواع من الأقمشة من المفضل نتجنبها حتى لو عجبك لونها أو تطريزها أو نقشتها.. من الأقمشة المزعجة في لبس الحجاب "الأوراجنزا الهايشة".. ابعدي عن الأقمشة "الناشفة" لأنها صعبة في الربط، خلي عنيكِِ على نوعية الأقمشة الناعمة والأقطان، الحرير، الحرير على قطن، الشيفونات بأنواعها كلها خامات حلوة جداً ومناسبة وعملية والتل كمان... بأكد إن الإيشارب مهم إنه يكون عملي في اللف، ممكن الإيشارب يكون غالي ووحش في ربطته وبعد شوية هتكرهي الإيشارب وهتركنيه على جنب بعد ما غرمتي ثمنه
أفكار لحجاب ممكن يناسب لفترة بعد الظهر أو بالليل؟
ممكن تحتفظي بشكل ربطتك اللي بترتاحي معاها والمناسبة لشكل واستدارة الوجه وتستخدمي إكسسوار مختلف.. حلق كبير، سلسلة فيها دلاية فيها حجر فيروزي، خاتم فضي بفص ملون.. النهارده مافيش لبس محدد للنهار وآخر لليل، مساحة الحركة تكون إضافة حاجة جديدة للبسك حسب وقت الخروج وطبعاً المناسب للمكان.
ازاي البنت المحجبة تختار الربطة المناسبة لشكلها؟
لازم تعرف هي بتحب إيه، الربطة التقليدية أو الربطة "الاسبانش" المربوطة "على ورا" عشان تكون مرتاحة ومقتنعة بربطة الإيشارب، ولو هي محجبة جديد ماتستعجلش على نفسها "شوية..... شوية" مش معقول هتقدر تلف الإيشارب زي واحدة متحجبة من زمان.. البنات بتكتئب وبتزعل قوي عشان شكل حجابها مش "مظبوط" عشان كده لازم المحجبة جديد تلبس في الأول حجاب ربطته سهلة ولا تستخدم أنواع ناعمة جداً ممكن تتزحلق بسرعة وتظهر شعرها، ممكن تستخدم الأقطان في البداية لأنها بتثبت، وعشان تلم شعرها كويس جداً تلبس "بونيه" قطن ولا تظهره، ومهمته مساعدتها في تثبيت الإيشارب ويمسك الشعر كله وتختار ربطة سهلة.
الربطة "الإسبانيش" موضة جداً، ازاي نربطها "صح" خطوة خطوة....؟
أولاً نلبس بونيه قطن يلم الشعر كويس وبعد كده نجيب طرحة مستطيلة لون تاني، فلو إن البونيه بني محروق تكون الطرحة تركواز تبين جزء من البونيه ونحط الطرحة الثانية بمحاذاة خط البونيه ونربطها على ورا كويس جداً وممكن نجيب طرحة تانية شيفون مثلاً وتكون لونها بني محروق ونربطها فوق التركواز، بعد كده نبين جزء منها زي ما عملنا في الخطوة السابقة ونربط كويس جداً، بعد كده نبدأ في ربط أطراف الطرحتين البني والتركواز بحيث ممكن نربط طرف الأولى مع الثانية والعكس، وإنتِ قدام المرايا هتلاقي نفسك بتربطي الأطراف، وممكن تبتكري تعملي الأطراف "كحكة" أو تعملي بطرف "كحكة" وتسيبي الطرفين نازلين على كتفك على حسب ذوق وشكل وجهك.
رأيك إن الرابطة "الإسبانيش" هتستمر شوية؟
أعتقد إنها هتكون خط عام بعد كده لأنها "عملية" وبتسمح للمحجبة أن تظهر جمال ملابسها لو كانت لابسة جاكت أو بدلة، وطالما الرقبة متغطية خلاص وبتسمح كمان باستخدام الإكسسوار.
نصيحتك للف الطرح التقليدية؟
لازم تلبسي بونيه قطن وتحطي الإيشارب على حرف البونيه عشان يختفي وتمسكي الطرف القصير بدبوس مشبك بالطرف الكبير وتلفي الطرف الطويل حول الرأس وتثبتي بالدبابيس، وبلاش أكتر من إيشارب في الأول.. كفاية لفة بسيطة.
ولو عاوزة تدخل ألوان في اللفة التقليدية؟
زي ما قلنا البونيه وبعد كده الإيشارب على حرف البونيه وبعدها تمسك الطرف القصير بالطرف الطويل عند الرقبة، وبعد كده الإيشارب الثاني بعده بمسافة من الأول وتمسك أطرافه وتلف طرف الأولى وطرف الثانية في اتجاه واحد بشرط طرف يظهر لونه قبل الثاني، أو تحط الطرفين فوق بعض وتلفهم مرة واحدة وتحط دبابيس للتثبيت.
ممكن تلبس "بندانا" وتلف الطرحة، ونصيحتي بلاش وضع شريط بلاستيك في مقدمة الطرحة.. ممكن تستخدمي "اسبراي نشا مخصوص للمكوى"، عشان تنشي الطرحة.
مش معنى الحجاب "أي طرحة وخلاص" ونهمل في شكلنا، بالعكس لازم تهتمي أكثر.. كنتِ زمان بتهتمي بشعرك وبتروحي للكوافير وبتهتمي بكل خصلة في شعرك، اعتبري الحجاب شعرك وامنحيه نفس الحب والاهتمام، فالحجاب لا يعني "البهدلة".
باعتبارك "ستايلست" وخبيرة في وضع مكياج للمحجبات، ازاي أحقق المعادلة.... أحط مكياج يخفي الإرهاق والشحوب وأحتفظ بوقار "الحجاب" وأتجنب لفت الأنظار؟
أتعجب من كميات البودرة وكريم الأساس اللي بتحطها البنت المحجبة وغير المحجبة بالنهار.. ماينفعش أداري عيوب في الوجه بوضع طبقات من المكياج.. لو لونك شاحب أو عندك هالات سوداء تحت عينيك اهتمي بنوعية أكلك، قللي من النشويات وكتري من الفاكهة والخضروات، "الشوام" بشرتهم حلوة عشان كمية الخضار كبيرة في وجباتهم، كمان بيهتموا بزيت الزيتون.. احنا بناكل أي حاجة "المحمر، والمكرونة... أي حاجة" وده غلط بدل ما تدور ازاي نتقل المكياج لازم نعيش وناكل صح.. جربي شرب المية بكميات يومياً هتلاقي بشرتك اتحسنت كثير جداً، واسألي نفسك "أنا باعمل إيه غلط في نظام حياتي اليومي"....!!
كمان ليه مابنحبش لون بشرتنا، البنت السمرا تحط بودرة فاتحة بكميات كبيرة وطبقات كريم أساس عشان تفتح لونها... ليه..؟!! ربنا أنعم علينا بلون حلو احنا مش بيض قوي أو سمر خالص، البشرة الخمرية جميلة جداً.
كل بنت عاوزة تحط لمسات تضفي على وجهها نضارة وهى في الشغل أو في الجامعة، تعمل إيه من وجهة نظرك؟
ممكن تستعمل كريم حماية للشمس وتكتفي بكريم حول العين فقط وقلم كحل وماسكرا و"Blusher" خفيف و"Lip gloss" فاتح.. ولو شكلها مرهق ممكن تستخدم بودرة شفافة أو بودرة لون بشرتها، وعلى فكرة لازم تجربي البودرة على خدك لأن الإيد خادعة جداً في تجريب درجات الألوان في المكياج، ممكن تحط "cover stick" خفيف حول العين وبلاش طبقات، وطبعاً البودرة الشفافة وكحل في العين أسود أو بني وبلاش ألوان، والـ"Blusher" إما روز أو بيج الألوان الطبيعية.... هي دي اللمسة البسيطة جداً.
ومن تجربة خاصة للحفاظ على البشرة ونضارتها استخدمي زيت الزيتون على الوجه وحول العين هتلاقي نتيجة هائلة... .
أحيانا تضطر المحجبة لخلع الحجاب عند الزفاف أو الخطوبة خوفاً من أن تكون وحشة أو أقل جمالاً من أقرانها؟ نصيحتك إيه؟
بصراحة باشعر إن البنت اللي بتخلع الحجاب بيكون شكلها وحش وهي من غير حجاب يوم الفرح... وليه أصلاً تخلعه؟ الآن فيه ربطات جميلة ومبتكرة وحلوة جداً للعرايس، وكمان الزهور المعمولة مخصوص بالأبيض والروز من الأوراجنزا وتزين بها الطرحة بتضيف جمال للعروسة المحجبة.. من خلال شغلي باحاول إني أبتكر وأجدد في الربطات والإكسسوارات عشان العروسة المحجبة تحب شكلها... وسؤال لكل بنت "تحبي تبدئي حياتك بمعصية؟"... ليه؟! طرحة المحجبة النهارده بيدخل فيها ألوان جميلة جداً، والتل ممكن يكون من تحته روز, تركواز, ذهبي عشان نكسر حدة الأبيض الكامل، وبتعوض غياب تسريحة الشعر أو الفورمة.
نصيحتك للعروسة المحجبة؟
تبحث عن لون مناسب لبشرتها يبرز جمال لونها تفكر في موديل مناسب لجسمها وتفكر ازاي يكون شكلها مختلف وجديد، ومش شرط إن موديل أو ربطة عجبتك إنها ممكن تنفع معاك أو تليق عليك، وكمان تختار حد يساعدها في ربط الطرحة لأنه متخصص وبيتحكم أكثر في الربط وله خبرة في ابتكار ربطات جديدة.
نرجع للبنت المحجبة في الجامعة ازاي تشتري إيشاربات تتناسب مع ميزانيتها؟
لازم يكون عندها الألوان الأساسية السادة، الأسود، الأبيض، بني، سماوي، كحلي عشان تمشي على الجينز.. مش شرط تكون الإيشاربات غالية، المهم لونها ينفع مع هدومي، وبالألوان تدخلي وتشكلي ألوان، ويظهر شكلك جديد في كل مرة.
ممكن تغيري في ألوان البونيه وتظهري طرفه ومن فوقه الإيشارب الأساسي دي حاجة عملية جداً ومناسبة لمصروفك، المهم اعرفي ألوان هدومك محتاجة إيه، وعلى فكرة الأقطان المصرية حلوة وأسعارها حلوة جداً.
سلبيات بتقع فيها المحجبة؟
لازم المحجبة تهتم بنفسها وفي نفس الوقت تحترم حجابها، البسي على الموضة زي ما إنتِ عايزة، ولكن راعي الحشمة، فالبنات النهادره بيلبسوا جينزات ضيقة جداً ولوويست وعلى رأسهم "إيشاربات".. حاجة متناقضة جداً!! ومش معنى كده كمان إنها تكون مبهدلة..!!
يتبع
الخميس فبراير 05, 2009 8:25 am